ومضات ..لحياة أفضل

واحنا أطفال كنا بنخبي اغلي اللعب اللي عندنا عشان متضعش وساعات عشان ميلعبش بها حد غيرنا "أنانية أطفال بقي👱" ....بس اللي كان بيحصل اننا بنسي احنا خبيناها فين ..فبيضيع علينا وقت الاستمتاع بيها وساعات كانت بتضيع مننا خالص ...

...

الومضة هنا : متخافش انك تخفي او تخبي المشاعر الحلوه الي جواك عشان متخسرهاش او غيرك يفهمها غلط ...لانك كدا بتدفنها وهتضيع منك للأبد !!

في اللحظة اللي تحس فيها بالخوف من الفشل أو بالفشل فعلا ..او اليأس والاحباط ...قبل ما تدخل في مرحلة المرض او حتي تقول انك مريض ..افتكر شخص تعرفه او سمعت عنه نفسه يموت عشان يتخلص من الم جسدي او عضلي ...افتكر حاله سمعت الدكاتره بيقولوا دا شفاءها ميئوس منه تماما ....

الومضة هنا :قبل ما توصل للمرحله دي افتكر النعم اللي ربنا اختصك بيها واحمده واشكره عليها 👐

الرزق مش بس الخير اللي ربنا بيبعته ليك ...الرزق كمان الشر اللي بيكفه عنك !! في نهاية كل يوم احسب انت كسبت ايه وكمان خسرت ايه وخليك فاكر ان الرزق مش بس فلوس ولا صحة ولا عيال  بس ....الرزق هو كل حاجة بتخليك مبسوط أكتر ..وأكتر ..

الومضة : خليك دايما حامد شاكر ..ونيتك صافيه لربنا ..هتكون من أسعد الناس 😄

جرب كدا تحب الخير للناس وتتمنالهم كل جميل في حياتهم وتدعي ربنا انهم يحققوا كل اللي بيتمنوه ..واحكيلي بعدها عن مشاعر قوية من  الراحة والسعادة  والفرحة اللي هتلازمك . 

الومضة هنا مش هتحس بالسعادة واللي حواليك ميعرفوهاش💛💚  

احفظ الجمله دي كويس " يوم ما تنتهي مشاكلك .. هو يوم وفاتك " ..الحياه مبتخلصش من المشاكل ..كل ما تحل مشكله هيظهرلك غيرها ..الحياة عباره عن شجرة بتطرحلك  ثمار ..كل ما تمد ايدك عشان تقطف ثمره ..هيطلعلك غيرها ..مره هتلاقي الثمره دي حلوه وطعمها جميل ...ومره هتلاقيها مر "(علقم)" ..

الومضة هنا : دورك وشطارتك تتعلم من الدرس وكل يوم تبقي أقوي واكثر حكمة ومعرفة من اليوم اللي قبله 👌 

لو استفدت حاجة من الكلام دا ..شاركه مع غيرك ..وليك كل الحب والاحترام ♥♥♥